reiru al startpaĝoIIK 2006 informoj > aliĝintoj > fotoj pri la kongreseto

 37a Internacia Infana Kongreseto     29 julio - 5 aŭgusto 2006   aliĝintoj


Aisling
13 j, Irlando-Svisio
      Mi jam loĝis en 4 landoj kaj parolas 4 lingvojn sufiĉe bone. Esperanton mi jam ekparolas. Mi havas kontaktojn kun esperantistoj ekde mia infaneco kaj partoprenis REF dufoje, sed tiam 2-3-jara. Mi ege ŝatas bestojn - oni ne malbone traktu ilin - kaj ĉevalrajdas ĉiusemajne. Mi ankaŭ tre ŝatas legadi.
Anna
12 j, Francio-Kroatio
      Mi ĉeestis IIK en Litovio en la lasta jaro. Antaŭe mi lernis pianon kaj violonon. Mi ŝatas dancadon, filmadon kaj muntadon.
Anikó
10 j, Hungario
Mi ĉeestis lastjaran IIK-on kaj plurajn REF-ojn. Mi ŝatas partopreni en multaj aktivecoj kaj leni ion novan.
Aurélien
9 j, Francio
      Mi lernas en kvara klaso. Mi ŝatas piedpilkon kaj havas fratinon. Mia patro estas farmisto. Li havas bovinojn kaj kultivas la kampojn. Dum la vintro, li estas skiada instruisto. Mi havas du hundojn.
Aurore
13 j, Belgio
      Mi vivas en Kraainem, Belgio. Mi parolas francan hejme, nederlandan en la lernejo kaj ĉe la skoltoj, kaj Esperanton dum ferioj. Mi ŝatas ĉevalojn. Mi havas grandan fraton Florian, fratinon Alice kaj fraton Killian.
Bojan
14 j, Kroatio
      Mi parolas Esperanton denaske. Tiu estos mia tria IIK, mi vizitis ankaŭ multajn REF-ojn kaj multajn mont-kabanajn renkontiĝojn. Mi ŝatus sportumi kaj bone amuziĝi kun ĉiuj.
Carina
10 j, Svedio-Kazaĥio
      Mi lernas en kvara klaso. Mi multe kantas kaj lernas ludi gitaron. Mi neniam antaŭe partoprenis IIK-on, sed kutimas multe vojaĝi kaj koncerti kun miaj gepatroj ĉe diversaj E-renkontiĝoj. Mi parolas ruse, svede kaj lernas Esperanton. Mi estas ege ĝoja partopreni IIK-on!
Ciara
10 j, Irlando-Svisio
      Ni nun loĝas en Bruselo. Mia kono de Esperanto estas iom pasiva, sed mi jam bone komprenas. Mi havas kontaktojn kun esperantistoj ekde mia infaneco. Mi tre ŝatas danci, gimnastiki, ĉiel ludi, kanti, lerni, naĝi, legi, kaj vintre lernis skiadon en Svisio.
Egle
12 j, Litovio
      Mi ŝatas artojn kaj scias pantomimi kaj mi faros tion ankaŭ kun vi. Mi parolas litove, iom angle kaj baldaŭ studos la rusan. Pri Esperanto mi scias delonge, sed komencis lerni ĝin nur lastatempe, ĉar mi volis kanti kun la aliaj infanoj de la grupo. Mia patrino ĉiam parolas al mi en Esperanto, kiam ni kune promenas, kaj unufoje semajne ni iras kune al la klubo por babili kun multaj aliaj personoj.
Ela
12 j, Kroatio
      Judita Rey instruas al mi Esperanton. Fine mi ne povis veni ĉi-foje al IIK.
Elio
9 j, Japanio-Francio
      Mi venos unuafoje al IIK. Mi ofte spektis Mazi en Gondolando, ofte aŭskultas E-kantojn kaj paĉjo laŭtlegas por mi librojn en Esperanto. Mi nun lernegas per Ludu kun ni. Jam mi multe komprenas kaj mi baldaŭ parolos pli bone. Mi venos al Eŭropo kun miaj patrino kaj frato. Hejme, ni parolas ĉefe japane kaj france, kaj foje Esperante. Mi ŝategas sporton. Mi ludas rugbeon ĉiun sabaton matene en la rugbeklubo de nia urbo, kaj bazpilkon en alia urba klubo du-trifoje semajne.
Ernesto
11 j, Kroatio
      Mi estas Ernesto. Mi estas 11-jaraĝa kaj frekventas 5-an klason de baza lernejo. Mi lernas germanan kaj Esperanton. Mi ŝatas pafi, korbpilkadi kaj ŝakludi. Mi ŝatus korespondi kun iu samaĝul(in)o.
Gretel
12 j, Francio-Germanio
      Panjo parolas france, paĉjo germane, lernejo instruas anglan. Esperanton mi uzas hejme, en REF kaj IIK. Mi lernas pianon de 5 jaroj kaj kantas en lerneja koruso. Mi ŝatas inviti amikinojn al mia hejmo. Kiam mi televidas, ankaŭ mia katino rigardas.
Heidi
8 j, Francio
      Mi estas Heidi, la fratino de Jean. Mi havas hundinon. Mi eble havos katon. La dua aprilo estas mia datreveno de naskiĝo.
Igor
11 j, Brazilo
      Mi loĝas en la lerneja farmo Bona Espero, kie mia patrino laboras kiel instruisto. Origine ni ambaŭ venis al UK por akompani blindulojn. Tamen mi povis ĉeesti IIK-on ekde lundo posttagmeze.
Iris
13 j, Germanio-Hispanio
      Jen mi! Mi parolas denaske Esperanton. Mia patrino estas hispanino kaj mia patro germano. En mia libera tempo mi sportumas multe: mi ludas futbalon, basketbalon, tablotenison kaj ludis dum kvin jaroj ĵudon. Dumvintre mi volonte skias. Mi ankaŭ ludas gitaron kaj legas sen paŭzo. Se Melinde legas ĉi tion: Multajn salutojn!
Jacopo
5 j, Italio
      Mi ĉeestos por ludi kun vi, kiam mia patro Nicola venas al IIK por helpi. Hejme li laŭtlegas al mi librojn en Esperanto kun belaj bildoj.
Jean
10 j, Francio
      Mi ŝatas piedpilkon. Mi havas hundinon kaj eble havos katon. Mi loĝas en montaro kaj veturas multe per biciklo. Mi havas fratinon kiu estas tre afabla, ni ludas multe kune. La nomo de mia logejo estas "Le Jocou". Mi vidos vin en julio.
Johann
10 j, Francio-Germanio
      Esperanton mi uzas hejme, en REF kaj IIK. Panjo parolas france, paĉjo germane. Mi lernas violonon de 3 jaroj kaj tre ŝatas grimpi ĉie. Mi ŝatas televidi kaj ludi sur komputilo kaj DS.
Joan
10 j, Katalunio
      Mia patrino nomiĝas Montserrat, mia avo Josep. Mia pli juna frato Andreu havas 5 jarojn. Mi lernas Esperanton. Hejme ni parolas la katalunan, sed ni uzas foje Esperanton. Mi komprenas, parolas kaj skribas tre flue la francan kaj hispanan, lernas ankaŭ la anglan. Mi deziras kaj esperas ke en la IKK mi povos uzi Esperanton!
Klára
11 j, Francio-Hungario
      Hejme ni parolas france kaj iom hungare, Esperanton precipe kun gastoj. Pli frue ni loĝis en Roterdamo kaj Bruselo, nun mi vizitas nederlandlingvan klason de Eŭropa Lernejo en Luksemburgio.
Leina
12 j, Kroatio
      Al IIK mi venos kun Judita Rey, de kiu mi lernas Esperanton.
Lelia
12 j, Britio
      Mia frato Aidan havas 14 jarojn kaj partoprenos en UK, do mi estos sola en IIK kaj esperas trovi amikojn. Mi havas 12 jarojn kaj partoprenis nur unu Esperantorenkonton (REF 2003) en Francio, kiam mi havis 9 jarojn. Mi loĝas sur insulo Wight (Ŭajt) en Anglio apud la strando. Mia panjo instruas nin hejme. Mi volas kontakti aliajn geknabojn (de ia aĝo) antaŭ partopreni en IIK. Se vi skribos al mi, mi respondos.
Léa
7 j, Francio
      Mi iras al lernejo en malgranda urbo apud Dijon. Mi ŝatas mian lernejon ĉar mi ŝatas lerni novajn aferojn. Mi konis esperanton antaŭ du jaroj kiam mi vojaĝis kun miaj gepatroj en Skotlando. Fakte mi nur komencis lerni Esperanton ĉi-jare. Mi pli bone komprenas ol parolas ĝin. Pasintjare, mi faris sportan ritman gimnastikon, nun mi lernas la folkloran dancon. Mi ankaŭ lernas transversan fluton. Mi povas ludi "Au clair de la lune", kaj kelkajn aliajn muzikpecojn. Dum la paskaj ferioj mi partoprenos en staĝo por infanoj en Grezijono.
Marta
7 j, Portugalio-Rusio
      Mi ĵus finis la unuan lernojaron. Mi scias legi, skribi kaj kalkuli. Mi scipovas la lingvojn rusan, portugalan kaj esperantan. Mia patrino estas rusa kaj mia patro portugala; ni loĝas en Lisbono. Mi eklernis Esperanton kiam mi estis bebo. Mi lernas ludi violonon; mi jam scipovas Baĥ-menueton (n-ro 1 en Suzuki-metodo) kaj aliajn pli facilajn.
Mathéo
8 j, Francio
      Mi havas du fratojn kaj baldaŭ havos novan fraton aŭ fratinon. Miaj gepatroj faros domon el pajlo. Ili ankaŭ havos farmbienon kun bovoj kaj per la lakto ili faros fromaĝon. Ni loĝas en la montaro Alpoj, en vilaĝo kiu nomiĝas Lus.
Mélie
12 j, Francio
      Mi havas du grandajn fratinojn. Mi aŭdas la lingvon de kiam mi naskiĝis. Mi legas ĉiun tagon iun libreton en Esperanto, sed ne ofte parolas kun la gepatroj. Ĉe la lernejo, mi studas la germanan. Mi ŝatas cirkon kaj ĵongladon. Mi ŝatus ke estu tabloteniso ĉe la kongreseto.
Melinde
13 j, Belgio
      Mi jam ĉeestis plurajn REFojn kaj IIKojn. Ĉi-jare, mia fration Karlijn ne venos pro sporta aktiveco. Mi ludas batinstrumenton Marimba. Mi ŝatas naĝi, sporti kaj turni telerojn per bastono.
Michaela
11 j, Germanio-Ĉeĥio
      Mia patrino estas ĉeĥino, mia patro germano, nia hejma lingvo estas Esperanto, kiun mi parolas denaske. Krome mi regas ambaŭ lingvojn de la gepatroj kaj en la lernejo lernas la latinan. Mi vizitas gimnazion - muzikan klason, flutludas, kantas en ĥoruso. Mi partoprenis diversajn UK/IIK-ojn. Mi ŝatas Italion, kie ni ĉiujare familie feriumas.
Ran
12 j, Israelo
      Mia nomo Ran venas de la hebrea verbo ran, kiu signifas kantas. Mi lernas en la sesa grado. Mi havas du fratinojn, Tali kaj Maja, kiuj denaske parolas esperanton. Mi havas katon. Mia patro kaj fratino instruis min paroli esperanton. Hebrean lingvon mi uzas ĉiutage denaske. Anglan lingvon mi lernas en la lernejo.
Ruben
8 j, Francio-Hungario
      Mi vizitas nederlandlingvan klason de Eŭropa Lernejo en Luksemburgio, sed pli frue loĝis en Roterdamo kaj Bruselo. Hejme ni parolas france kaj iom hungare, Esperanton precipe kun gastoj kaj dum niaj vojaĝoj. Mi ŝatas ludi subĉiele, ekz. bicikli kaj rulŝui. Mi ŝatus havi hejmbestojn, sed ni ne rajtas. Mi tre ŝatas legi Harry Potter kaj jam legis kvin volumojn.
Stéphane
10 j, Francio-Kroatio
      Mi venis jam al IIK en Litovio. Mi ludas gitaron kaj eble kunportos mian gitaron. Mi interesiĝas pri glacihokeo kaj komputiloj.
Tena
11 j, Kroatio
      Mi lernas Esperanton de Judita Rey, kun ŝi mi venos al IIK.
Teodora
14 j, Rumanio
      Mi venas el Timisoara, urbo de okcidenta Rumanio. Mi lernis esperanton de mia patrino kaj plibonigis ĝin dum IIK-oj apud Montpeliero, Zagrebo, Gotenburgo. Mi scipovas ankaŭ la francan kaj la italan. Mi ŝatas legi, babili, naĝi kaj danci. Mi estas feliĉa revidi vin.
Tomoya
12 j, Japanio-Francio
      Mi triafoje partoprenos IIK-on. Mi ŝatas rugbeon, bazpilkon, piedpilkon, naĝadon kaj ŝakon. Mi ludas rugbeon ĉiun duan sabaton matene en la rugbeklubo de nia urbo, kaj bazpilkon en la klubo de mia lernejo. Mi ŝatas Esperanton, plezure spektas la vidbendon Mazi en Gondolando, ofte aŭskultas la kasedon Ora team´ kaj la KDon Ĵus per kares´. Paĉjo ofte laŭtlegas librojn en Esperanto. Mi parolas ĉefe japane kun panjo kaj france kun paĉjo, kaj ambaŭ lingvojn kun mia frato. Hejme ni ankaŭ foje parolas germane, angle aŭ pli kaj pli Esperanto, ĉar nia familio nun verdiĝas.
Vít
13 j, Ĉeĥio
      Mi eble povas veni per buso al Florenco sen miaj gepatroj. Mi kunportos ludkartojn kaj ĵetteleron. Mi ŝatas ludojn, ĵongladon, manlaborojn kaj ekskursojn.
       
gvidantoj kaj helpantoj
Yoshie
45 j, Japanio
      Mi venos unuafoje al IIK. En ĝi mi ĝoje kaj efike helpos. Profesie mi estas lingvo-instruistino por infanoj. Jam antaŭ longe mi lernis Esperanton, sed iom forgesis, tial nun reekzercas.
Tali
21 j, Israelo
      Mia nomo Tali venas de la hebrea vorto Tal, kiu signifas roso. Nuntempe mi volontulas en antropozofia lernejo por infanoj kun cerba kaj korpa handikapeco, en Jerusalemo. Mi tre amas ties lokon, ĉeestantajn animojn kaj laboron. Mi esperas kompreni la vivon pli bone kaj helpi disvastigon de amo, libero kaj feliĉo. Mi ŝatas desegni, danci, naturon, promeni, mediti, esti kun amikoj, kanti, piani kaj skribi. Mia patro alparolis min Esperante ekde mia naskiĝo. Esperanton mi parolas kun li kaj geamikoj. Hebrean mi uzas en ĉiutaga vivo. Jam plurfoje mi partoprenis IIKn kiel infano kaj helpanto.
Nicola
41 j, Italio
      Mi loĝas en Pistojo, urbo inter Prato kaj Collodi, kie situas la Pinokjo-parko. Mi tre ŝatas infanojn kaj kutime kunlaboras en infanejo en mia urbo. Tre multe interesas min sperti pri kunesto de diverslingvaj infanoj per Esperanto. Dum IIK mi helpas foje tuttage, sed foje nur duontage pro mia laboro.
Leonardo
42 j, Italio
      Mi loĝas en Prato kaj gvidos vin tra mia urbo. Mi instruas en elementa lernejo kaj antaŭ kelkaj jaroj mi kunordigis projekton de internacia lerneja korespondado per Esperanto kadre de Programo Komenius de EK. Mi neniam partoprenis en UK aŭ IIK.
Judita
Kroatio
      Mi akompanos plurajn talentajn infanojn el mia urbo Zagreb, al kiuj mi instruas Esperanton.
Eszter
47 j, Hungario
      Jam plurfoje Eszter partoprenis en REF. Ĉi-jare ŝi akompanos sian filinon al IIK kaj helpos por kelkaj aktivecoj.
Bert
45 j, Francio-Germanio
      Mi estas patro de Gretel kaj Johann. Mi ŝatas foti kaj enretigi miajn fotojn. En laborejo mi programas per Lotus Notes sur komputilo. En loka grupo de bretona muziko kaj danco mi lernas bombarde (bretonan hobojon). Aliaj interesoj estas Yumeiho-terapio kaj bildlingvo Bliss.
Antonio
37 j, Portugalio
      Eta biografio: Portugalo naskita en 1969, eklernis esperanton en 1987. Aktiva landskale en la portugalia esperanto-movado, en 1999-2000 ankaŭ en tiu de urbo Ĉeboksaro (en Ĉuvaŝio, Rusio). Patro de denaska esperantisto (Marta). Profesie komputisto, eksa medi-ĵurnalisto kaj iama biologistudento.
Alano
58 j, Japanio-Francio
      Mi estas instruisto en universitato kaj restos en Japanio ĝis la fino de la ekzamen-periodo. Poste mi venos al IIK kiel helpanto. Miaj hobioj estas legado kaj aŭskultado de kantoj kaj kanzonoj en diversaj lingvoj. Mi kunportos kelkajn libretojn kun Esperantokantoj kaj esperas kanti kun vi.